Миодраг Тодоровиќ, тренерот на новакот во суперлигашката конкуренција Маџари, пред настапот во националниот Куп, во кој за противник ја имаат екипата на Кожув во четвртфиналето, вели дека натпреварувањето носи изненадувања, и се надева дека тоа ќе биде неговиот тим.
„Маџари против секој противник сака да победи. Го респектираме секого, така и екипата на Кожув која има одлични и странски и домашни играчи. Ние сме дебитанти на ова Куп-натпреварување, но нашата амбиција ја знаеме. Купот носи изненадувања, се надевам дека тоа ќе бидеме ние и ќе го дадеме максимумот“.
Ивица Димчевски ќе го претставува искуството на екипата која за прв пат е во една ваква ситуација, да биде дел од завршниот турнир од Купот.
„Купот е специфично натпреварување каде не секогаш победуваат фаворити. Првпат сме на завршницата, ќе се бориме на натпреварите да оставиме добар впечаток и да победиме“, истакна тој, цитиран од КФСМ.