ГРК Охрид и Филип Талески постигнаа договор за соработка за сезоната 2026/2027 со можност за продолжување за уште една година. Искусниот македонски интернационалец е осмото засилување на тимот предводен од српскиот тренер Борис Ројевиќ, освојувач на Купот на ЕХФ минатата сезона.
„Потписот за ГРК Охрид за мене претставува нов, голем предизвик и исклучително мотивирачки проект. Клубот покажа огромна желба, сериозна визија и амбиција кои целосно се поклопуваат со моите лични и спортски цели. Среќен сум што ќе го носам дресот на Охрид, клуб кој незапирливо расте и има фантастична публика. Охрид заслужува големи ракометни успеси, а јас сум тука да го дадам својот максимум на секој натпревар за да ги оствариме зацртаните цели на клубот како во домашното првенство, така и на меѓународна сцена“, изјави Талески.
Талески доаѓа од унгарски Татабања, со кого го играше финалето на Купот на ЕХФ против Охрид.
Тој дојде од академијата на Металург и рано замина за германскиот Рајн-Некар Левен, со кого ја освои титулата во Бундеслигата. Во Германија играше и за Балинген, а во текот на кариерата играше и за Вардар 1961 и Бенфика од Португалија.
