Светското првенство започнува за нешто повеќе од еден месец, а ТВ станицата која ги има правата за емитување на претстојните натпревари од Светското првенство излезе со примамлива понуда за фудбалските фанатици.
FOX TV, која влегува во проектот за Светското првенство со голема еуфорија и веќе го ангажираше Златан Ибрахимовиќ како професионален консултант, нуди 58.000 евра на навивач кој ќе ги изгледа сите натпревари од Светското првенство.
Од медиумот бараат лице кое ќе ги изгледа сите 104 натпревари за време на турнирот. Компанијата соработува со Indeed за да ангажира „главен набљудувач на Светското првенство на FOX One“.
Најавено е дека ангажираниот навивач ќе ги гледа натпреварите во живо во 4K резолуција на FOX One од специјално изграден простор за гледање на Тајмс Сквер во Њујорк.
Улогата е повеќе од само седење и гледање на натпреварите, бидејќи од среќниот навивач ќе се очекува да креира и споделува содржини на социјалните мрежи во текот на турнирот, прикажувајќи ги своите реакции додека ја следат секоја минута од акцијата на Светското првенство.
„Ова Светско првенство ќе биде историски турнир кој бара подеднакво историско вработување. Еден ангажиран кандидат ќе ја добие работата на својот живот за да ја доживее и прослави секоја приказна, секоја нација и секој возбудлив момент што ја дефинира прекрасната игра“, рече Роберт Готлиб, претседател на маркетинг во FOX Sports.
За да бидат разгледани за позицијата, FOX ги поканува кандидатите да ги креираат своите профили на Indeed до 17 мај доколку сакаат да бидат разгледани.
