Новак Ѓоковиќ одлучи да ги „отвори картите“ пред почетокот на Ролан Гарос, но вестите што доаѓаат од неговиот табор воопшто не се охрабрувачки. Српскиот ас отворено призна дека се бори со физички проблеми и дека неговите очекувања во Париз, за прв пат по долго време, се значително намалени.
Иако Новак наскоро ќе наполни 39 години, суровата приказна за спортот на врвно ниво си зема данок. Подготовките за вториот Гренд слем во сезоната се далеку од идеални, со оглед на тоа што Србинот годинава одигра само три турнири. Откако стигна до финалето на Австралија Опен, имаше долга пауза и само еден натпревар на земјена подлога пред Париз – оној во Рим, каде што беше поразен од Дино Прижмиќ.
Во интервју за медиумите, Ѓоковиќ нагласи дека ги чувствува ефектите од возраста и тврдиот ритам, признавајќи дека повеќе не е толку брз како што сме навикнати да го гледаме.
– Фрустрирачки е. Во исто време, моја одлука е да продолжам да настапувам во таква состојба и услови. Гледам што ми недостасува, на половина чекор сум зад себе. Дефинитивно не сум таму каде што сакам да бидам за да се натпреварувам на највисоко ниво и да можам да одам далеку – искрен е Србинот.
Тој додаде дека ваквите ситуации се повторуваат:
„Да бидам искрен, ова не е идеална подготовка. Не се сеќавам кога последен пат во последните неколку години имав подготовки без никакви физички или здравствени проблеми пред турнир. Секогаш се случува нешто. Тоа е нова реалност со која морам да се справам“.
Иако освојувачот на 24 Гренд слем титули е познат по својот цврст режим, сега мора да ги слуша сигналите што му ги испраќа неговото тело.
– Тренирам напорно. Тренирам колку што ми дозволува телото. А како ќе заврши сè на теренот е навистина непредвидливо – рече Ѓоковиќ.
Новак ќе биде трет носител во Париз, зад Јаник Синер и Александар Зверев.
