Поранешната светска тенисерка број еден, Наоми Осака, го прифати позитивно својот пораз од Арина Сабаленка во четвртото коло на Ролан Гарос и верува дека многу се променила во споредба со нејзините претходни години во професионалниот спорт.
По неколку години обележани со предизвици со своето ментално здравје, долги паузи од тенисот и мајчинството, јапонската тенисерка го напушти турнирот во Париз со позитивен став.
„Би била многу разочарана од себе по вакви натпревари. Да го изгубев тој натпревар кога бев помлада, ќе се заклучев во мојата соба или нешто слично, но сега чувствувам дека очигледно го сакам тенисот и се обидувам да дадам се од себе за да бидам најдобра што можам“, рече Осака по поразот, цитирана од Ројтерс.
Четирикратната Гренд слем шампионка верува дека нејзините приоритети повеќе не се резултатите и рангирањето, и дека се преиспитала по раѓањето на нејзината ќерка.
„Како да одам на работа и да си одам. Среќна сум што си одам дома да ја видам ќерка ми. Искрено, ова е еден од најсреќните моменти во мојот живот“, објасни јапонската тенисерка.
Наоми Осака стигна до четвртото коло на Ролан Гарос за прв пат во својата кариера, но предизвикот од светската тенисерка број 1, Арина Сабаленка, се покажа како премногу сериозен. Сепак, Јапонката сега верува дека поразите не се одлучувачки за неа.
„Сфатив дека тоа воопшто не е важно. Единственото нешто што можам да направам е да продолжам да давам сѐ од себе“, рече Осака.
