Арина Сабаленка полека, но сигурно се пробива во редовите на најдобрите тенисерки во историјата, а тоа го докажа синоќа во Мајами. По својот нов триумф, таа изјави дека отсекогаш сакала место во историјата и сега го постигнала тоа.
Таа е петтата тенисерка која го освоила т.н. „Саншајн дабл“, а сега влезе во друштво на Штефи Граф (2), Ким Клајстерс, Викторија Азаренка и Ига Швјонтек.
„Навистина звучи сосема нереално. Дури и не знам како го постигнав ова, но сум многу горда на себе“, истакна таа на прес-конференцијата по мечот.
Благодарение на победата против Коко Гоф со 6:2, 4:6, 6:3, Арина постигна уште неколку важни работи. Прво, таа се искачи пред второпласираната Елена Рибакина за дури 2.917 поени. Второ, таа ја освои својата 11-та таква титула, изедначувајќи се со Ига Швјонтек. Двете се најуспешните активни тенисерки, додека рекордерка е Серена Вилијамс со 23.
Мартина Хингис 17, Штефи Граф 15 и Марија Шарапова 14 имаат повеќе од нив. Линдзи Девенпорт, исто така, има 11.
– Немаше шанси да го изгубам ова финале – рече „тигрицата“ од Минск, која го освои својот трет трофеј оваа година. Таа има 21 победа и само еден пораз оваа сезона. Сепак, тој единствен пораз дојде во најважниот натпревар, финалето на Австралија Опен.
Само три тенисерки пред неа имаа ваков почеток на сезоната – стигнувајќи до финалето на сите четири од првите турнири во овој милениум: Мартина Хингис, Серена Вилијамс и Викторија Азаренка.
– Бев максимално концентрирана во секој момент, постојано барајќи решенија, постојано потсетувајќи се себеси колку сум силна и добра, самоуверено кажа Белорусинката.
Нејзина следна цел се два големи турнири на земјена подлога. Таа никогаш не победила во Рим или Ролан Гарос, додека во Мадрид освоила три шампионски титули, а тоа покажува колку брзи се условите за играње во „Меџик бокс“, поради надморската височина.
