Од почетокот на сезоната во Формула 1, Ауди постојано изјавуваше дека нивниот најголем дефицит во споредба со лидерите во светското првенство доаѓа од погонскиот систем, кој сè уште не е на потребното ниво.
Сега, менаџерот на проектот, Матија Биното откри дека целта на тимот е да го елиминира овој дефицит до 2028 година. Поранешниот шеф на Ферари, исто така, додаде дека верува оти Ауди моментално ја има четвртата најдобра шасија во Формула 1.
„Задоволен сум од шасијата. Дури и разговараме за ова со возачите, не правиме само GPS телеметриска анализа. Пред се, имаме добра корелација помеѓу аеродинамичкиот тунел и симулаторот. Од инженерска гледна точка, тоа беше најважното нешто. Повторно, во нашите процеси и методологии, направивме чекор напред.
Мислам дека нашиот автомобил е многу брз во кривините. Веруваме дека сме можеби четвртиот најдобар тим во однос на шасијата, што е неверојатно, со оглед на тоа што ова е поранешниот Заубер.
На нашиот пат кон 2030 година, мислам дека следниот вистински чекор ќе биде во 2028 година, бидејќи за да почнете да победувате, да освојувате подиуми и да имате добри резултати, ви треба добар автомобил. Не зборуваме само за инфраструктурата или големината на тимот. Исто така, ви треба автомобил. Ако ја мерите нашата разлика во однос на нашите конкуренти, денес, нашата најголема разлика доаѓа од погонскиот склоп, каде што веруваме дека треба да направиме значаен чекор напред за да ја намалиме разликата.
И кога зборуваме за погонскиот склоп, периодот е секогаш подолг. Процесот на развој трае значително подолго од аеродинамиката. Затоа велам дека следниот значаен чекор не може да се направи на краток рок бидејќи мора да го промениме целиот хардвер на моторот. Затоа веруваме дека нашиот мотор не може да биде добар или подобар како другите во 2027 година, па затоа нашата цел е 2028 година“, објасни Биното.
