Поранешниот инженер на Ферари и Вилијамс, Роб Смедли, предупреди дека возачите кои ги напуштаат врвните тимови на Формула 1 за да станат број еден во послабо пласиран тим, ретко се враќаат на успехот. Интересно е што Смедли се осврна на Оскар Пјастри и шпекулациите дека тој би можел да го замени Макс Верстапен во Ред Бул.
Смедли се појави во поткастот „High Performance Racing“ и објасни дека ова размислување уште посилно се однесува на возачите кои се оставени во сенка на своите тимскиколеги – како што му се случи на Пјастри во минатогодишната битка за титулата со Ландо Норис.
„Ако си возач во таков тим и не можеш да се натпреваруваш со својот колега, враќајќи се на моите денови во Ферари, што правиш? Дали одиш во полош тим кој навистина нема шанси да ја освои титулата, за да бидеш прв возач?“ праша Смедли. „Го видов тоа многу пати, видов многу возачи како го прават тоа и никогаш не испадна добро. Никогаш не сум видел возач посреќен потоа.“
По завршувањето на интервјуто, стана јасно дека реакцијата на Смедли беше предизвикана од веста дека Ред Бул го таргетирал Пјастри, кој ќе го замени Макс Верстапен ако четирикратниот светски шампион го напушти тимот.
Се верува дека Пјастри има договор со Мекларен до крајот на 2027 година и иако Вокинг го гледа како составен дел од долгорочниот развој на тимот, Австралијанецот би можел да биде во искушение да стане број 1 во Ред Бул, каде што би му бил партнер Исак Хаџар.
Макс има договор со Ред Бул до крајот на 2028 година, но претходните шефови на тимот потврдија дека тој содржи клаузули што му дозволуваат на Верстапен да си замине порано, дури и по крајот на 2026 година.
