Џорџ Расел ги критикуваше ривалите на Мерцедес дека бараат начини да го забават автомобилот на „Сребрените Стрели“, наместо да се фокусираат на тоа да ги направат своите автомобили побрзи.
Коментарите на светскиот шампион во Формула 1 доаѓаат во време на низа дискусии околу W17 уште од пред Божиќ. Првично, главниот фокус на контроверзноста беше компресијата на моторот на „Сребрените Стрели“, која ќе биде подетално следена од 1 јуни. Сега, фокусот се префрли на предното крило на Мерцедес, кое го привлече вниманието на експертите на Големата награда на Кина пред две недели.
„Така функционира спортот, отсекогаш така функционирало“, рече Расел кога го прашаа дали чувствува дека има мета на грбот.
„Навистина напорно работевме за да стигнеме до оваа позиција и најдобриот тим треба да биде на врвот. Имавме четири тешки години. Имаше уште два тима кои доминираа и победија. Не мислам дека е во ред сите да се обидуваат да нè забават затоа што сме на врвот, особено по само две трки“, се пожали тој.
„Сезоната е многу долга, па работите ќе се променат. Веќе знаеме дека Ред Бул се многу цврсти, Мекларен сè уште не почнале да го подобруваат својот болид и го користат пакетот од тестот во Бахреин. Не треба да ги заборавиме тие работи. Во моментов имаме предност, но мислам дека едноставно почнавме подобро од другите и направивме подобра работа. Се надевам дека ќе можеме да ја задржиме таа предност, но нема гаранции“, додаде лидерот во светскиот шампионат.
