Непоразениот поранешен апсолутен светски шампион во тешка категорија, Олександр Усик, откри кои се двајцата најверојатни противници за последниот боксерски меч во неговата кариера.
Украинецот рече дека сака да ја заврши својата професионална кариера со борба против големо име, не исклучувајќи ја можноста ова да се одржи под покровителство на новата боксерска организација Zuffa Boxing.
„Ми треба големо име. Сега е тука Zuffa. Можно е Дана Вајт и Неговата Екселенција да ми дадат понуда. Зошто да не? Мојот последен танц ќе биде во Соединетите Држави, можеби на стадион во Њујорк. Мора да биде големо име“, рече Усик во интервју за YouTube каналот Daily Mail Boxing.
Кога го прашаа на кого мисли, Украинецот именуваше двајца противници.
„Кого го сметам за таков? Алчниот дебел човек“, рече Усик со насмевка, мислејќи на Тајсон Фјури. „И Дионтеј Вајлдер. Да, тоа се двајцата кандидати за мојата последна борба.“
Усик (38) веќе го победи Тајсон Фјури двапати, но третата борба меѓу нив двајца би била привлечна за љубителите на боксот. Другата опција е судир со поранешниот шампион на WBC, Дионтеј Вајлдер, кој со години е еден од најопасните нокаут-артисти во тешка категорија.
