Ерлинг Халанд можеби е незапирлив ѕвер на фудбалскиот терен, но неговиот приватен живот е, според неговото сопствено признание, неверојатно приземен и мирен. Норвешкиот напаѓач е во долгогодишна врска со 22-годишната манекенка Изабел Хаугсенг Јохансен, а сега се појавија детали за тоа како започнала нивната романса, како и каков е секојдневниот живот на еден од најплатените спортисти во светот.
Интересно е што токму Изабел го иницирала контактот. Иако се познавале уште од детството во нивниот роден град Брин, каде што двајцата играле за локалниот клуб Брин ФК, искрите се разгореле дури години подоцна.
– Ми прати порака. Играше во истиот клуб како и јас, во Брин. Таа беше таа што ме „муваше“, не бев јас – искрено призна 25-годишниот напаѓач, потсетувајќи се на периодот во 2021 година кога играше за Борусија Дортмунд.
Халанд истакна дека фудбалската позадина на Изабел (таа играше за женскиот тим на Брин од 13 години) била клучна за нивното разбирање.
– Таа играше фудбал, така се запознавме. Убаво е, бидејќи таа го разбира фудбалот и сè што оди со него – додаде тој.
Иако богатството на Халанд се проценува на десетици милиони фунти, а неговата неделна плата во Сити е неверојатни 500.000 фунти, двојката најмногу ужива во „обичните“ работи. Кога ја прашале како изгледа нивната идеална вечер, одговорот на Ерлинг изненадил многумина.
– Јас готвам вечера. Ова веројатно ќе ѝ звучи малку срамно, но таа обожава да игра видео игри. Значи, заедно играме „Мајнкрафт“. Седиме, играме и градиме куќи. Или се враќаме дома во Брин и нарачуваме „kebab“ – открил Халанд.
Двојката го доби своето прво дете, син, во декември 2024 година, но одлучија неговиот идентитет да го чуваат строго приватен. Изабел, која има речиси милион следбеници на Инстаграм, свесно поставува граници.
„Сакам да го заштитам моето семејство, но во исто време сакам луѓето подобро да ме запознаат. Предизвикот е да се повлече границата помеѓу она што е приватно и она што не е“, изјави Изабел за норвешкото списание КК.
Сепак, животот во Англија нуди и одредени придобивки што одат со статусот на Халанд. Фудбалерот потрошил 6,2 милиони фунти за вила со десет спални соби во Чешир, со езеро и базен. Имотот е толку простран што, како што велат изворите, „може да го смести целиот тим“. Ерлинг неодамна доби и дозвола да изгради гаража за неговата колекција суперавтомобили од 10 милиони фунти, која вклучува и редок Бугати Турбијон вреден 4 милиони фунти.
– Тоа е место каде што Ерлинг може целосно да се исклучи од фудбалот – вели извор близок до играчот.
И додека руши рекорди на теренот, се чини дека Халанд го пронашол совршениот баланс во Изабел, докажувајќи дека дури и со светска слава, можно е да се води повлечен семеен живот.
