Атлетико Мадрид синоќа ја победи Жирона со 1:0 во претпоследното коло од шпанската Ла Лига, а овој натпревар беше и збогување на Антоан Гризман со навивачите на мадридскиот клуб.
Договорот на Гризман истекува на крајот од сезоната и тој ќе го напушти клубот, а по натпреварот во кој тој регистрираше асистенција во 21-вата минута за Адемола Лукман, сите 70.000 навивачи останаа на стадионот Метрополитано за да се збогуваат со легендата на клубот.
„Пред се, сакам да ви се заблагодарам што останавте на трибините. Ова е неверојатно“, рече Гризман, по што беше прекинат од огромен аплауз од трибините.
Гризман потоа повторно се извини што се пресели во Барселона во 2019 година, каде што остана две сезони, а потоа се врати во мадридскиот клуб во 2021 година.
„Второ, морам да кажам нешто многу важно за мене. Повторно ве молам за прошка. Не сфатив колку љубов имав тука, бев многу млад и направив грешка. Долго време размислував за тоа и направив сè за да се вратам тука и повторно да уживам“, рече Гризман.
По говорот во кој не можеше да ги скрие солзите, Гризман го прошета почесниот круг со сопругата и децата, а потоа беше придружуван до соблекувалната од неговите соиграчи на трибините.
Гризман одигра вкупно точно 500 натпревари за Атлетико, во кои постигна 212 гола и имаше 100 асистенции, а кариерата ќе ја продолжи во американскиот клуб Орландо.
