Карло Анчелоти даде јасна изјава од далечниот Бразил за тоа што му недостасува на италијанскиот фудбал, кој падна на многу ниско ниво.
Главниот проблем, според него, е недостаток на брзина.
„Фундаменталната разлика помеѓу Серија А и Лигата на шампионите е брзината. Не само трчањето, туку и менталното темпо, постојаната ангажираност, интензитетот, што не е празен збор и не може да се примени само во одредени фази од играта. Италијанскиот фудбал го изгуби токму тоа, но ја изгуби и својата цврстина“, рече селекторот на Бразил.
А квалитетот е под знак прашалник.
„Веќе ни недостасува талент во другите делови од теренот, но прекумерниот фокус на тактиките ги искриви нашите карактеристики, оние врз кои отсекогаш сме ја граделе нашата историја“, рече легендарниот Италијанец.
„Азурите“ нема да играат на Светското првенство трет пат по ред, а ситуацијата не е подобра ни на клупско ниво – Интер од 2010 година е последниот тим од Апенините што ја освои Европа.
„Одлични странски играчи повеќе не доаѓаат во Италија. Во минатото, тоа беа Фалкао, Марадона, Платини, Румениге, Роналдо, Роналдињо… Некој од кого младите италијански играчи можат да учат“, јасен е Анчелоти.
Италијанците го изгубија својот идентитет, верува Анчелоти.
„Или ќе се вратиме на дефанзивниот менталитет што ни донесе успех на клупско и репрезентативно ниво или ќе продолжиме да се мачиме. Фудбалот не е само постигнување повеќе голови од противникот, туку и примање помалку голови. Тоа не е тривијална изјава“, заклучи Анчелоти.
