Познатиот поранешен фудбалер, а подоцна и тренер на Барселона, Чави Ернандез би можел да стане селектор на мароканската репрезентација.
Каталонецот (46) нема никакви тренерски обврски откако ја напушти Барселона пред 18 месеци, во кој период беше поврзуван со неколку клубови, но не брза да избере нова работа.
Според шпанскиот весник „Марка“, тој е на прагот да ја преземе мароканската репрезентација, која треба да учествува на Светското првенство ова лето.
Локалната федерација бара замена за сегашниот главен тренер Валид Реграги. Тој поднесе оставка откако тимот не успеа да го освои турнирот Африкански куп на нации, чиј домаќин беше.
Федерацијата сè уште официјално не го објави разделувањето од Реграги, но веќе води разговори со неговите потенцијални наследници.
Според „The Athletic“, Чави е посклон да ја прифати работата по Светското првенство, бидејќи верува дека сега ќе има малку време да ги наметне своите идеи пред Светското првенство.
Мароканската репрезентација е во група со Бразил, Шкотска и Хаити.
