Пеп Гвардиола донел одлука да го заврши својот успешен престој во Манчестер Сити на крајот од сезоната. Според „Дејли меил“, шпанскиот стручњак планира официјално да ја извести јавноста по натпреварот против Астон Вила дека го напушта „Етихад“, и покрај фактот дека неговиот договор со клубот трае до следната сезона.
Гвардиола е на чело на Сити од 2016 година и во тој период освои сè што може да се освои, вклучувајќи повеќе титули во Премиер лигата и трофејот во Лигата на шампионите.
Истиот извор тврди дека раководството на клубот веќе почнало да ги информира најважните спонзори за евентуалното заминување, додека во понеделник во Манчестер би можело да се организира свечена парада за да се збогува тренерот со навивачите.
Пред дуелот со Астон Вила, Сити го очекува важен натпревар против Борнмут, кој би можел да има големо влијание врз исходот од трката за шампионската титула.
Кога станува збор за наследник, се шпекулира со две имиња – Енцо Мареска, кој долго време се поврзуваше со враќање во клубот, и Винсент Компани, поранешен капитен на Сити и сегашен тренер на Баерн Минхен.
