Жељко Обрадовиќ е голема желба на сопственикот на Панатинаикос, Димиртис Јанакопулос, пишува грчкиот „Тоталбаскет“, наговестувајќи враќање на најтрофејниот тренер во Евролигата на клупата на „зелените“ од Атина.
„Панатинаикос повторно размислува за враќање на човекот кој ја промени историјата на клубот! Жељко Обрадовиќ се појави како главна желба на сопственикот на клубот за новата ера на Панатинаикос, додека иднината на Ергин Атаман е под голем знак прашалник по разочарувачката сезона“, објавува „Тоталбаскет“.
Откако го напушти Партизан, Обрадовиќ постојано се поврзува во грчките медиуми со враќање на клупата на Панатинаикос по 14 години.
Веројатно нема навивач на „зелените“ кој не сонува повторно да го види на клупата, каде што освои 23 трофеи од 1999 до 2012 година: пет Евролиги, 11 грчки првенства и седум грчки Купови.
По неуспехот во плејофот на Евролигата, Ергин Атаман е на излезна врата.
