Анхел ди Марија упати изненадувачки остра критика кон Атлетико Мадрид. Аргентинската легенда коментираше за односот на „јорганџиите“ кон играчите, поточно таргетирајќи ги своите сонародници во тимот на Мадрид – Хулијан Алварез, Науел Молина, Нико Гонзалез, како и Родриго де Пол. Ди Марија не штедеше зборови за атмосферата на „Метрополитано“.
„Атлетико е малку чуден клуб. Кога работите одат добро, навистина одат добро. Но, потоа, од одреден момент, мислам дека тие едноставно ги „исклучуваат“ играчите. Фудбалерите почнуваат да исчезнуваат. Ова им се случува на повеќето момци кои одат таму. Малкумина успеваат да одржат серија настапи во борбата за титулата и никогаш да не испаднат од составот“, рече Ди Марија.
И покрај негативните забелешки за клупските кариери на неговите соиграчи, Ди Марија ја истакна острата промена во нивното однесување кога се приклучуваат на кампот на „албиселесте“. Според него, националниот тим делува како вентил за играчите кои се чувствуваат угнетени во своите клупски тимови.
„Важно е сè да се промени кога ќе бидат повикани за репрезентацијата на Аргентина. Добрата работа во врска со националниот тим е што кога овие момци ќе го облечат „сино-белиот“ дрес, тие стануваат различни луѓе. Тие се менуваат и играат на неверојатен начин. Тие уживаат да бидат дел од тимот“, додаде Ди Марија.
Критиките од Ди Марија звучат уште понеобично со оглед на тоа што Атлетико Мадрид е предводен од неговиот сонародник Диего Симеоне. Во својата изјава, крилниот напаѓач не го спомена синот на тренерот, Џулијано Симеоне, кој исто така игра за „јорганџиите“.
Зборовите на ветеранот доаѓаат во клучен момент, додека светските шампиони се подготвуваат за сериозен предизвик. На крајот од месецот, се очекува Аргентина да се соочи со моќниот тим на Шпанија во долгоочекуваната „Финалисима“, каде што формата на играчите од Ла Лига ќе биде клучна.
