Минатата недела се крена многу прашина, сè поради Винисиус Жуниор за време на натпреварот против Бенфика. Бразилецот го обвини играчот на Бенфика, Престијани, дека го навредувал на расна основа, па натпреварот и резултатот паднаа во втор план.
Во деновите потоа, Реал Мадрид собираше докази што на крајот ги проследи до УЕФА. Но, сега клубот се најде во незгодна ситуација – нивен играч е обвинет за расизам.
Реал Мадрид денес се извини во име на дефанзивецот Дин Хујсен на кинеската социјална мрежа Weibo. Причината за контроверзноста беше откако содржина што некои корисници ја протолкуваа како навредлива за Азијците беше повторно споделена на неговиот Инстаграм профил.
„Искрено им се извинувам на моите кинески пријатели. Претходно, ненамерно испратив содржина што содржеше навредливи пораки. Беше целосно ненамерно и ми е жал за непријатностите што ги предизвикав“, се вели во официјалното соопштение на мадридскиот клуб, објавено на кинески јазик на платформата.
Контроверзната објава се појави овој викенд, кога Хуијсен повторно сподели фотографија што кинеските корисници ја оценија како расистичка, бидејќи, според нив, алудираше на обликот на азиските очи. Снимката од екранот, која оттогаш е отстранета од неговиот профил, прикажуваше лице од азиско потекло со два коментари – „Дури и Кинезите го нарекуваат Кинез“ и „Можете да му ги врзете очите со забен конец“.
Изјавата, која Реал Мадрид ја објави на својот профил на Weibo – платформа што е широко користена во Кина – предизвика силни реакции кај кинеските навивачи. Некои од нив го доведуваат во прашање обемот на извинувањето и бараат јавно соопштение и на меѓународните канали.
Останува да се види дали ова ќе се случи во наредните часови или денови.
