Менаџерот на Манчестер Сити, Пеп Гвардиола, денес на прес-конференција зборуваше за Рамазан и влијанието на постењето врз играчите кои постат за време на светиот месец. Тој се осврна и на денешната ждрепка за нокаут фазата во Лигата на шампионите.
Кога станува збор за играчите на Сити кои постат, Гвардиола рече дека целиот тренерски штаб им посветува посебно внимание на муслиманските играчи во тимот.
„Тие ги следат овие религиозни традиции и, секако, имаме добри нутриционисти кои се прилагодуваат на потребите на тимот. Тие добро се грижат за нив и знаат како да се справат со овие ситуации. Тие не се млади, тие се навикнати да играат многу години во овој период“, рече Гвардиола.
Во врска со натпреварот што Сити го игра против Реал, Гвардиола рече дека секој нов натпревар против овој клуб е можност за учење и развој.
„За нашиот клуб, секој пат кога играме против најдобриот тим во историјата на ова натпреварување, учиме, се развиваме и стануваме подобри за иднината“, рече тој.
