Се приближуваме до почетокот на Светското првенство, кое ќе се одржи во САД, Канада и Мексико, а до почетокот на турнирот остануваат уште 57 дена.
Една од главните теми е сè уште Иран, или поточно прашањето дали ќе игра на претстојното Светско првенство. Сепак, претседателот на ФИФА, Џани Инфантино, во среда ги отстрани сите сомнежи, велејќи дека Иран „дефинитивно“ ќе игра на турнирот, објави CNBC.
Зборувајќи на форумот „Инвестирајте во Америка“ во Вашингтон, Инфантино беше јасен: „Иранската репрезентација доаѓа, сигурно. Се надеваме дека дотогаш, се разбира, ситуацијата ќе биде смирена, што сигурно би помогнало. Но, Иран мора да дојде. Тие го претставуваат својот народ. Тие се квалификуваа и играчите сакаат да играат“.
Инфантино, исто така, откри дека неодамна ја посетил иранската репрезентација во нивниот тренинг камп во Анталија, Турција, за лично да ја види нивната желба да играат.
„Ги посетив пред две недели. Тие навистина сакаат да играат и треба да играат – спортот треба да биде надвор од политиката. Секако, ние не живееме на Месечината, ние живееме на Земјата, но ако нема никој друг што верува во градење мостови и нивно зачувување, тоа сме ние“, рече Инфантино.
Иран ќе игра во група на Светското првенство против Нов Зеланд, Белгија и Египет.
