Повторно избраниот претседател на Барселона, Жоан Лапорта, понуди интересен увид во иднината на Ханси Флик на „Ноу Камп“, осврнувајќи се на клучни прашања, почнувајќи од трансфери до повреди и растечкото влијание на „Ла Масија“.
Во неодамнешното интервју за „Мон Спорт“, претседателот на Барселона јасно стави до знаење дека самиот Флик одлучил да ги одложи сите разговори за договорот.
Лапорта објасни дека Германецот сака јасност пред да се посвети на својата иднина.
„Тој претпочита да ја анализира ситуацијата на крајот од сезоната и да одлучи што да прави“, рече Лапорта.
Дополнително објаснувајќи го ставот на тренерот, Лапорта нагласи дека нема брзање од страна на Флик, и покрај подготвеноста на клубот да го продолжи неговиот престој.
„На крајот од сезоната, кога работите ќе се смират, ќе разговараме за тоа. Тој не чувствува потреба да брза. Мислам дека заслужува продолжување, но претпочита да разговара за тоа на крајот од сезоната, да ја процени ситуацијата и да одлучи што да прави понатаму. Ако одлучиме за уште една година, тој веќе ја има.“
Стратегија за трансфери
Освен прашањето на тренерот, Лапорта се осврна и на трансфер политиката на Барселона, алудирајќи на повнимателен пристап наместо агресивно трошење.
„Нема потреба да се оди на пазарот само заради тоа, но мора да погледнеме што веќе имаме во клубот за да го подобриме тимот доколку е потребно. И покрај нашата финансиска состојба, успеавме да ги доведеме играчите што ги сакаа нашите тренери. Чави го побара Гундоган и тој беше доведен“.
Потоа Лапорта изрази оптимизам за зголемувањето на приходите, што би можело да овозможи поголема флексибилност на пазарот.
„Сите клубови во Ла Лига се соочуваат со овој проблем. Економската контрола е многу строга. Мораме да разговараме со комисијата и да ги објасниме нашите предлози. Моментално генерираме приходи од 1,1 милијарда евра, повеќе од очекуваното. Тоа многу ќе ни помогне да го добиеме финансискиот фер-плеј што ни е потребен за да доведеме засилувања. Се надевам дека ќе го земат тоа предвид и ќе ни дозволат да доведеме играчи без ограничувања ова лето“.
Повреда на Рафиња
На спортски план, Лапорта не ја криеше својата фрустрација поради неодамнешната повреда на Рафиња, која се случи за време на репрезентативните обврски и ќе го оддалечи од теренот неколку недели.
„Навистина е фрустрирачки кога еден од вашите најдобри играчи ќе се повреди на пријателски натпревар. Не можете да обвинувате играч затоа што е професионалец и игра за својата земја, каде што мора да даде се од себе. Скандалозно е што ФИФА поставува толку тесен распоред и не ги зема предвид официјалните натпреварувања.“
Претседателот на Барселона се осврна и на иднината на позајмените играчи Маркус Рашфорд и Жоао Кансело, нагласувајќи дека конечната одлука ќе ја донесат Деко (спортскиот директор) и Флик.
„Деко и Флик мора да одлучат. Рашфорд има добра сезона, а Кансело игра исклучително.“
Пофалби за Ла Масија
Лапорта особено ја нагласи важноста на Ла Масија, истакнувајќи ја новата генерација таленти што го обликуваат идентитетот на Барселона.
„Бернал, Ламин Јамал и Кубарси беа столбот на нивниот тим во Ла Масија. Чави Еспарт исто така доаѓа од таа генерација. А пред нив ги имаме Гави, Фермин, Балде, Ерик Гарсија. Ла Масија е основата на нашиот проект. Се потпираме на пазарот само во посебни ситуации.“
Вести од Камп Ноу
Конечно, вниманието се сврте кон долгоочекуваната реконструкција на стадионот Камп Ноу, при што Лапорта наведе прелиминарен датум на завршување и можни алтернативи.
„Целта е работата на Камп Ноу да биде завршена до почетокот на 2028 година, вклучително и поставувањето на покривот. Додека го поставуваме покривот, првичната намера не беше да се вратиме во Монжуик, но тоа ќе зависи од времетраењето на работата и потребата од привремено решение. Ако доцнењето е кратко, само неколку натпревари, стадионот Јохан Кројф би бил идеален, но ако потрае подолго, можеби ќе мора повторно да се вратиме во Монжуик“, заклучи претседателот на Барселона.
