Три англиски гиганти – Ливерпул, Челси и Манчестер Јунајтед, ќе се обидат да ги искористат проблемите во Вест Хем и да го привлечат капитенот на тимот, Џарод Бовен, тврди локалниот печат.
„Чеканите“ се многу блиску до испаѓање, бидејќи се во опасната зона и се два бода зад 17-тото место на Тотенхем. Испаѓањето во пониска дивизија ќе ги принуди шефовите на Вест Хем да се разделат од некои од своите водечки играчи, а Бовен ќе биде еден од најбараните од водечките клубови на Островот.
Крилниот напаѓач покажа солидна конзистентност во перформансите и покрај лошите настапи на неговиот тим во последните години, а оваа сезона дури беше повикан од Томас Тухел за претстојното Светско првенство во САД, Мексико и Канада.
Играчот може да игра како крилен напаѓач, но и како чист напаѓач, а во пет од неговите шест целосни сезони во Вест Хем има двоцифрен број голови. Токму овие квалитети го привлекоа вниманието на некои од водечките тимови во Англија, кои ја следат ситуацијата.
Цената на Бовен (29) исто така ќе биде значително пониска ако „чеканите“ испаднат од лигата на крајот од оваа недела.
