Флорентино Перез го очекува лето на големи одлуки. Ретко се случувало во неговата ера Реал Мадрид да не освои трофеј две сезони по ред, а оваа ситуација бара сериозна реакција. Првенствено во однос на новиот тренер, каде што сите го гледаат враќањето на Жозе Мурињо.
Иако веста одекна како бомба и изгледаше како завршена работа, дури и по неколку недели ништо не е потпишано. А првиот човек на Реал остана енигматичен во однос на новиот тренер.
– Ни треба добар тренер. Бидејќи добар тренер ќе го натера нашиот тим да функционира, бидејќи ги имаме најдобрите играчи во светот. Мурињо? Тој е многу добар тренер – рече Перез.
Секако, кога станува збор за основачот на Галактикосите, секогаш се очекуваат големи засилувања.
– Луѓето знаат дека секогаш ги носам најдобрите играчи во Реал Мадрид, порача тој.
Долго време се зборува за потенцијалното заминување на Винисиус од Мадрид. Многу фанови се надеваат на тоа сценарио, а тоа изгледа сè пореално со оглед на тоа што неговиот договор истекува следното лето. Сепак, првиот човек на кралскиот клуб има спротивно мислење.
– Се надевам дека ќе потпише нов договор. Тој е еден од најдобрите во светот, истакна шефот.
