Пеп Гвардиола наводно им се доверил на блиски пријатели дека би сакал да ја преземе репрезентацијата на Англија во иднина. Тој го сторил тоа само неколку дена откако го напушти Манчестер Сити, со кого освои 17 титули за десет години, според англиските медиуми.
Новинарот Џек Гоган, кој го следи Сити за „Дејли меил“, изјави за „Скај спортс“: „Не мислам дека повторно ќе го видиме во клупскиот фудбал, иако е познат по тоа што може брзо да се предомисли. Пред неколку дена, додека се збогуваше со навивачите во Манчестер, неговата најстара ќерка објави нешто на Инстаграм. Таа не пишуваше само за Сити, туку за фудбалот во минато време, што звучеше како проштално писмо.“
„Сепак, тој им кажал на пријателите дека би сакал да ја води Англија во иднина, па ако околностите се совпаднат, тоа е нешто на што треба да се обрне внимание“, додаде тој.
Веќе се шпекулираше дека Гвардиола сака шанса да се бори за титулата светски шампион, откако освои сè што можеше да се освои во својата клупска кариера. Со Сити, тој освои шест англиски првенства, вклучувајќи четири по ред, а со Барселона и Баерн беше шампион на Шпанија и Германија по три пати. Сепак, трикратниот освојувач на Лигата на шампионите сè уште не се обидел како тренер на големо меѓународно натпреварување.
Доколку е заинтересиран исклучиво за клупата на репрезентацијата на Англија, Гвардиола ќе мора да биде трпелив, потсетуваат медиумите. Актуелниот тренер Томас Тухел потпиша нов договор во февруари што го обврзува на позицијата до Европското првенство во 2028 година.
