Фудбалерите на Башкими со доминантна игра го затворија вториот циклус од Првата македонска фудбалска лига, совладувајќи ја екипата на Македонија Ѓ.П. со 2:0.
Клучниот момент дојде во 73-тата минута. По еден продор во шеснаесетникот, Пановски беше непрописно сопрен од Еступиниан, а главниот судија без двоумење покажа на белата точка. Искусниот Аворнио беше ладнокрвен реализатор за водство од 1:0.
Точка на натпреварот и потврда на петтата позиција на табелата стави Ресул Мемети во 83-тата минута. По одличен контранапад и асистенција на Рибеиро, Мемети ја затресе мрежата за конечни 2:0 и огромна радост на трибините во Куманово.
Фудбалерите на Тиквеш го совладаа Пелистер со 1:0 и ја забележаа втората последователна победа во првенството. Кавадарчани освоија нови три бода и повторно беа поуспешни во соочувањето со директен конкурент во трката за опстанок во Првата македонска лига.
Натпреварот беше решен во 38. минута, а стрелец на голот e Мартин Стојанов и тоа по асистенција на новото име во редовите на Тиквеш, Лусијанињо.
