По еден од најдобрите натпревари во сезоната, спектаклот помеѓу ПСЖ и Баерн кој заврши со дури девет гола, фудбалска Европа вечерва го насочува вниманието кон Мадрид. Но, овој пат очекувањата се значително различни.
Атлетико и Арсенал го играат првиот натпревар од полуфиналето на Лигата на шампионите вечерва во 21 часот, а јавноста очекува многу помирен и тактички позатворен дуел. Причината е јасна: ова се два тима кои негуваат сосема поинаков пристап од она што го видовме претходната вечер.
Додека ПСЖ и Баерн нудеа отворен фудбал без калкулации, Атлетико и Арсенал се познати по својата дисциплина, контрола и тактичка организација. Ова особено важи за тимот на Диего Симеоне, кој со години го гради својот идентитет врз цврста одбрана и транзиции.
Без оглед на стилот, влоговите се огромни. Атлетико и Арсенал никогаш не ја освоиле Лигата на шампионите, а победникот од овој натпревар ќе добие шанса да испише историја.
