Фудбалската федерација на Босна и Херцеговина го промени времето на пријателскиот натпревар против Македонија, кој ќе се игра на 29 мај на стадионот „Асим Ферхатовиќ Хасе“.
Натпреварот требаше да започне во 18 часот, но денес фудбалската федерација на Босна и Херцеговина објави дека времето на почеток е поместено во 20:30 часот.
„Фудбалската федерација на Босна и Херцеговина ја информира јавноста дека, по договор помеѓу претставниците на двете федерации терминот на пријателскиот натпревар помеѓу репрезентациите на Босна и Херцеговина и Македонија е променет“, објавија од федерацијата.
За потсетување, дуелот ќе биде еден од тестовите за „Змејовите“ како дел од нивните подготовки за Светското првенство во Америка, Канада и Мексико.
Светското првенство започнува на 11 јуни и трае до 19 јули, а БиХ ќе се натпреварува во група со Швајцарија, Канада и Катар.
