Откако неодамна беше ослободен од функцијата виш советник на сопствениците на Рома, Клаудио Раниери изрази подготвеност да ѝ помогне на италијанската репрезентација доколку таму биде побаран.
Тој пред една година ја одби понудата да стане селектор токму поради неговата посветеност на „волците“. Сега, сепак, легендарниот стручњак увери дека ќе одговори доколку „азурите“ го побараат тоа.
„Порано велев „не“ затоа што бев зафатен со Рома и не можев да работам на две места. Но, сега сум слободен, па зошто да не? Никогаш не кажувајте „никогаш“. Дали би бил директор или тренер? Ако ве побараат, мора да кажете „да“ и тоа е тоа. Мораме повторно да се вратиме на нозе и не треба да отсуствуваме од големите првенства“, изјави Раниери за „Скај Спорт Италија“.
