Капитенот на Велс и поранешен играч на Арсенал, Арон Ремзи, го објави своето пензионирање од фудбалот, со што ја заврши својата 20-годишна кариера.
Ремзи им се заблагодари на навивачите на Велс и на клубовите за кои играше, објавувајќи ја својата одлука на социјалните мрежи.
„Ова не беше лесна одлука. По долго размислување, решив да се повлечам од фудбалот“, рече Ремзи.
„Прво, сакам да почнам со Велс. Беше чест да го носам дресот на Велс и да доживеам толку многу неверојатни моменти. Не би било можно без неверојатниот придонес на сите тренери под чие водство играв и целиот персонал кој ми помогна на толку многу начини“, рече тој.
Потоа Ремзи им се обрати на навивачите на националниот тим, нагласувајќи дека тие биле тука за него во добри и лоши времиња, во подеми и падови и дека му било чест да ги претставува.
„Второ, благодарам на сите клубови за кои имав среќа да играм. Благодарност до сите тренери и персонал кои ми помогнаа да го остварам мојот сон и да играм на највисоко ниво“, рече Ремзи.
Ремзи е без клуб откако го напушти Пумас во декември, а не играл за мексиканскиот клуб од септември.
Според британските медиуми, се очекува дека 35-годишниот Ремзи да се посвети на тренерска кариера.
Ремзи одигра повеќе од 250 натпревари за Арсенал и го носеше дресот на репрезентацијата на Велс 82 пати, постигнувајќи 21 гол и претставувајќи ја својата земја на три големи турнири.
Тој ја започна својата кариера во Кардиф, пред да се пресели во Арсенал во 2008 година, со кого освои три трофеи од ФА Купот за време на неговите 11 години во клубот.
Потоа Ремзи играше за Јувентус, Ница и повторно Кардиф, каде што кратко време беше привремен главен тренер на крајот од минатата сезона.
Тој се приклучи на Пумас со надеж дека ќе ја задржи својата форма за Светското првенство оваа година доколку Велс се квалификува. Сепак, откако не успеа да најде нов клуб, Ремзи реши да ја заврши својата играчка кариера.
