Стефан Ристовски би можел да се врати во клубот каде што ја започна својата професионална кариера. Искусниот 34-годишен дефанзивец е блиску до потпишување за Вардар, актуелниот шампион на Македонија.
Вардар неодамна го смени тренерот. Миодраг Божовиќ го презеде тимот по заминувањето на Кристијано Фабијани, а клубот се обидува дополнително да го зајакне својот состав во последната фаза од преодниот рок. Една од главните желби е Ристовски, кој може да игра на позицијата десен бек, но и како централен бек.
По заминувањето на Дарко Велковски, се отвори позиција во одбраната, а според информациите, постои меѓусебен интерес помеѓу Вардар и Ристовски. Сега се чека евентуалната конечна реализација на договорот. Ристовски е слободен агент откако неодамна го раскина договорот со Сараево. Со враќањето во Вардар, тој би го затворил кругот повеќе од 15 години откако го напушти скопскиот клуб како млад фудбалер и замина во странство.
„Вардар“ не ја започна новата сезона на најдобар начин. Актуелниот македонски шампион веќе заостанува осум бода зад лидерот Шкендија, па доаѓањето на искусен репрезентативец треба да биде голем поттик за тимот.
