Познатиот италијански новинар Фабрицио Романо ја објави големата вест што одекна низ целиот фудбалски свет. Зинедин Зидан постигна усмен договор за преземање на француската репрезентација.
Според неговите информации, легендарниот Французин треба да стане селектор на „Триколорите“ веднаш по завршувањето на Светското првенство во 2026 година, а на клупата ќе го замени Дидие Дешан, кој веќе објави дека заминува по Светското првенство.
Иако сè уште нема официјална потврда од Француската фудбалска федерација, Романо наведува дека договорот практично е постигнат и дека се чека вистинскиот момент за формализирање на соработката.
Зидан е без тренерски ангажман откако го напушти Реал Мадрид во 2021 година, а неговото име се поврзува со клупата на „триколорите“ со години.
Како играч, тој го освои Светското првенство во 1998 година и Европското првенство во 2000 година, додека како тренер на Реал Мадрид испиша историја со три последователни титули во Лигата на шампионите.
Покрај тоа, тој освои две Ла Лига, две Светски клупски првенства, два Суперкупа на УЕФА и два Суперкупа на Шпанија како тренер на Реал Мадрид.
