Голманот на Тотенхем, Антонин Кински, ја прокоментира кошмарната ноќ во Мадрид, односно неговото деби во Лигата на шампионите.
Младиот голман направи две кардинални грешки во првите 15 минути, кои домашните ги искористија и за „петлите“ веќе немаше враќање назад во натпреварот.
Менаџерот на лондончани, Игор Тудор одлучи да го замени во 17-тата минута, а 22-годишниот Кински го напушти теренот во солзи и се упати кон соблекувалната.
Многумина го осудија потегот на хрватскиот стратег, конкретно актуелни и поранешни голмани, а сега и самиот Кински се огласи на социјалните мрежи.
„Како голман сонувате за големи ноќи како оваа, но понекогаш фудбалот е сурова игра и одеднаш сè тргнува наопаку. Јас ја преземам одговорноста за моите грешки. Раното излегување од игра е болно, а напуштањето на теренот беше еден од најболните моменти во мојата кариера. Но, исто така знам дека сето ова е дел од фудбалот. Паѓаш, но наоѓаш сила повторно да станеш. Благодарен сум им на моите соиграчи и навивачи кои продолжија да ме поддржуваат дури и во вакви моменти. Вашата поддршка ми значи повеќе од сè. Ви ветувам дека ќе продолжам да работам уште понапорно и дека ќе се вратам и ќе го докажам мојот квалитет“, рече Кински.
