Шкендија стигна до својата четврта победа во низа откако на домашен терен ја совлада екипата на Струга Трим Лум со резултат 2-1, во меч исполнет со темпо, пресврти и значајна улога на VAR-системот.
Притисокот на домашните донесе резултат и во 29. Минута, Арбин Зејнулаи одлично асистираше, а Нзенгуе ја затресе мрежата за 1-0. Неколку минути подоцна, истиот играч постигна уште еден гол, но по реакција на VAR-системот, тој беше поништен поради офсајд.
Струга ТЛ влезе поагресивно во вториот дел. Во 55. минута Радески ја погоди пречката, а во продолжение на акцијата беше прегледана ситуацијата каде Адурахмани направи прекршок врз Буњамин Шабани во казнетиот простор. Судијата покажа на белата точка, а Малески во 59. минута реализираше за 1-1.
Одлуката падна во 84. минута: По брза акција на Шкендија по левата страна, Арби Воша го фаулираше Нзенгуе во шеснаесетникот. Сигурен реализатор на најстрогата казна беше искусниот Бесарт Ибраими, кој ги постави конечните 2-1.
Вардар стави крај на негативната низа откако го совлада Силекс со убедливи 4-1 на Националната Арена „Тодор Проески“ во Скопје. Исправени пред предизвикот, вардарци одиграа ефикасен меч и апсолутно ги заслужија трите бода, иако и Силекс беше квалитетен ривал.
Вардар поведе уште во третата минута. Спахиу побегна по левата страна, уфрли во средината, а Димитар Данев со прецизен удар го совлада голманот Џеков.
Силекс израмни во 37.минута. По една долга акција, Ефтимов од левата страна го проигра Анѓелески, а капитенот на Вардар со одличен шут го совлада Талески.
Во 63.минута, Михаил Маневски успеа да ја затресе мрежата на Силекс, а шест минути подоцна Мигел Пиреш погоди против поранешниот тим за 3-1. Во 89.минута, Едиз Спахиу стави точка на триумфот за конечни 4-1.
