Сопственикот на Ковентри Сити, Даг Кинг, не е вознемирен од гласините дека менаџерот Френк Лампард би можел да се врати да го води својот поранешен клуб Челси. Англискиот менаџер ги врати „сините“ во Премиер лигата за прв пат по 25 години, освојувајќи го второто ниво на фудбал со победа од 5-1 над Портсмут во вторникот.
Лампард потоа беше прогласен за менаџер на сезоната во дивизијата по резултат од 26 победи, 11 нерешени и само седум порази. Поради неговиот успех во Ковентри, поранешниот играч од средниот ред на Челси повторно е меѓу кандидатите за менаџерската функција на Лондончани, откако претходно беше на чело на тимот помеѓу 2019 и 2021 година, и повторно во 2023 година.
„Тој се снаоѓа одлично, последните 18 месеци беа одлични за мене и за него. Сигурен сум дека размислува за тоа токму сега. Му реков: „Не потценувај колку е тешко да се направи она што си го постигнал.“ Неговите достигнувања како играч се огромни, но да нè извадат од оваа лига како шампиони без никакви падобрански плаќања (финансиска помош од највисоката лига до оние во пониските нивоа на Англиската фудбалска лига – н.з.) од каде што дојдовме е огромно достигнување што никој не може да му го одземе“, рече Даг Кинг.
Според него, Лампард се чувствува среќен во Ковентри и дури е емоционално поврзан со градот.
„Можете да видите колку е емоционално поврзан со градот, што значи за него да освои промоција и титула, и мислам дека тој најде среќно место во моментов. Тоа не значи дека нема да има некоја голема понуда за него во лето, но тој ќе мора сам да избере бидејќи се докажа како висококвалитетен главен тренер, но нема да коментирам за тоа, не можам да го контролирам“, објасни Кинг.
Ковентри Сити го освои првото место во Чемпионшип со 89 бода од 44 кола, а следната сезона ќе се натпреварува во Премиер лигата за прв пат од 2000/2001 година.
