Фудбалскиот клуб Вардар повторно е лидер во домашниот шампионат. Вчера Шкендија обезбеди висока и убедлива победа во Кавадарци, а денеска Вардар на комплексот Петар Милошевски во Скопје, против Шкупи освои рутински три бода со конечни 7:0.
Вардар повторно е лидер со 68. бодови, пред Шкендија со 67.
Пелистер конечно одигра натпревар на кој доминираа од првата до последната минута и не оставија простор за сомнеж кој ќе ги однесе трите бода на мечот со Македонија ЃП (2:0).
Скопскиот тим е традиционално тежок противник за Пелистер, но домашните успеаја да креираат иницијатива од почеток и да создадат повеќе шанси од кои можеа да постигнат гол.
Со овие три бода Пелистер сега е на 9. место на табелата со 29 бода, а зад него се трите позиции кои водат во ВМФЛ. Во моментов, Работнички има 25 бода (и натпревар помалку), Македонија ЃП е претпоследна со 24 и Шкупи има само еден бод.
Во следното коло Македонија ЃП е домаќин на Работнички, а Пелистер гостува кај Брера.
