Селекторот на Англија, Томас Тухел, се насмевна кога го прашаа дали неговиот тим ќекористи Вијагра поради проблемите со надморската висина пред осминафиналниот натпревар на Светското првенство против Мексико. Додека Тухел ги негираше таквите обвинувања, играчот од средниот ред Џордан Хендерсон се пошегува на истата тема.
Натпреварот помеѓу Англија и ко-домаќинот Мексико се игра на легендарниот стадион Ацтека во Мексико Сити, кој се наоѓа на 2.200 метри надморска височина. Надморската височина се смета за огромна предност за мексиканската репрезентација, која има импресивен рекорд од 70 победи, 17 нерешени и само два порази во 89 натпревари на тој стадион. Самиот Тухел призна дека Англија не може „физички да се адаптира“ на време за натпреварот што ќе се игра во недела навечер.
Токму поради специфичните услови беше поставено необично прашање на прес-конференцијата на Тухел. Вијаграта, брендираното име за силденафил, е најпозната како лек за лекување на еректилна дисфункција, но неговите ефекти врз атлетските перформанси на голема надморска височина се исто така проучени.
„Дали е вистина дека сте користеле Вијагра за борба против ефектите од надморската височина? Таа информација излезе, значи дали е вистина?“, праша новинарот.
„Не сум слушнал за таа информација“, одговори Тухел со насмевка. „Тоа не е вистина“. Џордан Хендерсон подоцна беше прашан како тимот се справува со предизвикот да игра на Ацтека. „Па, Вијаграта помага“, одговори Хендерсон духовито, пред брзо да додаде: „Се шегувам“.
Шпекулациите за Вијаграта се базираат на теоријата дека лекот ги опушта крвните садови во белите дробови, што го намалува притисокот во пулмоналната артерија, ја подобрува размената на гасови и овозможува подобра испорака на кислород за време на напор на надморска височина. Сепак, не е јасно дали лекот би имал некаков ефект.
Проект на Светската антидопинг агенција (WADA) ги истражуваше ефектите на силденафилот врз спортистите и заклучи дека веројатно нема корисен ефект врз испораката на кислород или перформансите на надморска височина под 4.000 метри за огромното мнозинство тренирани спортисти.
„Ефикасноста на силденафилот за време на вежбање на надморска височина е неразделно поврзана со неговата способност да го подобри снабдувањето со кислород… Големината на овие ефекти се чини дека е одредена од сериозноста на надморската височина и поврзаната хипоксија, како и индивидуалната подложност на пулмонална вазоконстрикција предизвикана од хипоксија“, заклучува истражувањето.
Менаџерот на Англија потврди дека тимот ги чувствува ефектите од надморската височина пред клучниот натпревар, по нивниот прв и единствен тренинг во такви услови.
„Знаете што, го чувствуваме тоа“, рече Тухел. „Почувствував мала главоболка во текот на денот во хотелската соба и не спиев толку добро како во претходните денови. Тоа не е ништо со што не можеме да се справиме и да се прилагодиме. Играчите го почувствуваа тоа во првите минути од тренингот и колку подолго траеше, толку подобро се справуваа со тоа.“
