Легендарниот англиски фудбалер Вејн Руни го коментираше укинувањето на суспензијата на американскиот фудбалер Фоларин Балогун, кој доби црвен картон во натпреварот од шеснаесетфинале на Светското првенство против Босна и Херцеговина.
„Пред Европското првенство 2012 година, добив суспензија од три натпревари, што значеше дека ќе ја пропуштам целата групна фаза. Потоа буквално ми рекоа: „Ако одиш во Швајцарија и направиш еден тренинг со група дечиња, ќе ти го поништиме тој трет натпревар“. Не се согласував со тоа, но на крајот прифатив, затоа што не сакав суспензија од три натпревари. Сепак, мислев дека е погрешно“, рече Руни.
Потоа директно се осврна на последната одлука на ФИФА.
„Но, да му се суспендира казната вака? Или да се поништи црвениот картон, што веројатно беше правилна одлука за да може човекот да игра, или да се остави казната. Сепак, да се одложи за една година е апсолутна срамота. Инфантино треба да се срами од ова бидејќи верувам дека токму спортскиот дух на оваа игра е доведен во прашање тука“, рече Руни и додаде:
„Да бев противник на Соединетите Американски Држави, би бил апсолутно бесен. Мислам дека ова е погрешно во секој поглед. Ова е апсолутна срамота.“
Ноќта понеделник кон вторник во 2:00 часот наутро, Америка ќе игра натпревар од осминафиналето против Белгија, а селекторот на САД ќе го има Балогун на располагање по одлуката на ФИФА.
