Кошаркарот на Мемфис Гризлис, Брендон Кларк, почина на 29 години, објави неговата агенција „Прајорити Спортс“, а потврди и клубот.
Кларк пристигна во НБА во 2019 година, кога беше избран од Мемфис како 21-ви пик на драфтот. Канадскиот крилен центар ја помина целата своја професионална кариера во најсилната лига во светот во дресот на Гризлис.
— Memphis Grizzlies (@memgrizz) May 12, 2026
Клубот брзо ја потврди лошата вест, која првично ја објавија американските медиуми.
„Скршени сме од трагичната загуба на Брендон Кларк. Брендон беше исклучителен соиграч и уште подобра личност, чие влијание врз организацијата и пошироката заедница на Мемфис нема да биде заборавено. Изразуваме најдлабоко сочувство до неговото семејство и најблиските во ова тешко време“, се вели во соопштението на клубот.
Тој одигра само два натпревари во текот на тековната сезона. Прво, го пропушти почетокот на првенството поради повреда на коленото, а потоа во декември претрпе повреда на листот, што го спречи повторно да игра.
Американските медиуми потсетуваат дека Кларк бил уапсен во Арканзас на почетокот на април, каде што бил осомничен за повеќе прекршоци, вклучувајќи поседување и трговија со контролирани супстанции, како и бегство со возило по пречекорување на дозволената брзина. Откако поминал еден ден во притвор, бил ослободен со кауција.
Покрај кошарката, Кларк бил активен и во хуманитарна работа. Во 2025 година, тој основал фондација која им помагала на семејствата погодени од трагедии и на социјално ранливите граѓани на Мемфис.
Пред неговата НБА кариера, тој играше за Сан Хозе Стејт и Гонзага, а во времето на неговата смрт беше еден од играчите со најдолг стаж во тимот на Мемфис.
Кларк беше избран во најдобриот дебитантски тим во неговата прва година, но во следните години не го исполни целосно својот потенцијал.
