НБА лигата и кошаркарскиот свет е во шок по веста дека Брендон Кларк, крилниот центар на Мемфис Гризлис, починал на 29-годишна возраст.
Иако официјалната причина за смртта сè уште не е објавена, американските медиуми, предводени од новинари од „NBC Los Angeles“, презентираат морничави детали и хипотези за несреќата. Според нивните информации, се сомнева дека смртоносниот исход се должи на употреба на нелегални супстанции.
– Во куќата се пронајдени предмети поврзани со употреба на дрога, а инцидентот се истражува како можно предозирање – велат извори блиски до истрагата.
Властите потврдија дека болничари од Лос Анџелес пристигнале во домот на Кларк во понеделникот кратко по 17 часот по итен повик, но тој не можел да биде спасен. Обдукција ќе се изврши во наредните денови за да се утврдат точните околности на трагедијата.
NBC News, исто така, потсети дека кошаркарот неодамна имал проблеми со законот, откако бил уапсен за пребрзо возење и поседување сомнителни супстанции, но во тоа време не беа објавени повеќе детали.
Кларк ја помина целата своја НБА кариера во Мемфис, кој го избра како пик од првата рунда на драфтот во 2019 година. Сепак, последниот период бил исклучително тежок за него.
Во сезоната 2025/2026, тој одигра само два натпревари, откако повредите на листот и коленото целосно го извадиле од ритам, поради што го пропушти поголемиот дел од натпреварувачката година.
За потсетување, Мемфис ја заврши сезоната неславно, на 13-то место во Западната конференција, со само 25 победи во 82 натпревари.
Последниот натпревар во кој Кларк бил дел од тимот се одиграл на 13 април против Хјустон Рокетс, во кој Мемфис бил поразен со резултат од 101:132.
