Ветеранот Дрејмонд Грин верува дека неговиот долгогодишен ментор во Голден Стејт Вориорс, Стив Кер, би можел да го напушти тимот пред почетокот на следната НБА сезона.
„Воините“ беа елиминирани во плеј-ин турнирот и го пропуштија НБА плејофот по втор пат во последните три сезони, а Стив Кер изјави по поразот од Финикс Санс со 96-111 дека ќе размисли за својата иднина во наредните недели.
Грин (36), кој е редовен стартер во тимот на Кер откако тој ја презеде функцијата во 2014 година, очекува престојот на американскиот стручњак да заврши пред почетокот на следната сезона.
„Се надевам дека тој ќе биде наш тренер следната сезона. Сакате мое мислење? Не мислам дека ќе биде. Едноставно така чувствувам. Чувствувам дека е крај“, објасни Дрејмонд Грин во својот поткаст, цитиран од ESPN.
По поразот од Феникс, Стив Кер стоеше сам со Грин и неговиот долгогодишен соиграч Стеф Кари покрај теренот за да го означат крајот на нивната 12-та заедничка сезона. Микрофоните во просторијата успеаја да ги фатат зборовите: „Не знам што ќе се случи следно, но ве сакам многу. Ви благодарам.“
Во своите 12 сезони на чело на Голден Стејт, Стив Кер освои четири титули во НБА и двапати стигна до финалето, вклучително и во сезоната 2015-16, кога постави рекорд за најмногу победи во регуларната сезона – 73. Во 2022 година, тој беше именуван за еден од 15-те најдобри главни тренери во историјата на НБА, а во март 2025 година, се најде на првото место по победи меѓу тренерите на Вориорс.
Стив Кер ја предводеше репрезентацијата на Соединетите Американски Држави до златен медал на Олимписките игри во Париз во 2024 година, а во 2023 година, под негово водство, тимот стигна до четвртото место на Светското првенство на ФИБА.
Како играч, тој е петкратен шампион во НБА – три пати со Чикаго Булс (1996, 1997, 1998) и двапати со Сан Антонио Спарс (1999 и 2003).
