Турскиот клуб Фенербахче ја продолжува соработката со Евролигата до понатамошно известување, објави турскиот клуб денеска. Актуелниот шампион на елитното европско натпреварување објави дека ја продолжил соработката со Евролигата и дал поддршка на уникатен план за развој на европската кошарка, се наведува во соопштението.
Кампот на турскиот великан, меѓу другото, јасно посочи дека во претходниот период разгледувале и други опции, но дека во овој момент Евролигата е најдобриот избор за иднината на клубот.
„Внимателно и конструктивно ги разгледавме различните проекти и организациски иницијативи што неодамна се појавија во врска со иднината на европската кошарка. Како Фенербахче, нашиот пристап никогаш не бил насочен кон поделба, напротив, отсекогаш бил насочен кон обединување, со цел да придонесеме за развојот на европската кошарка преку заеднички напор“, се вели во соопштението на турскиот клуб.
Во продолжение се додава дека клубот „внимателно ја следи визијата што ја има НБА за Европа“.
„Во текот на целиот овој процес, цврсто верувавме во важноста на воспоставување дијалог со сите актери за иднината на овој спорт и постојано се залагавме за таков став. Исто така, внимателно ја следиме визијата на НБА Европа за европската кошарка и нејзиниот поглед на глобалниот развој на играта. Веруваме дека овој интерес, заедно со други инвестициски иницијативи, е од особено значење за иднината на европската кошарка. Основното верување на Фенербахче е дека целосниот потенцијал на европската кошарка ќе се реализира само ако соперништвото е ограничено исклучиво на теренот, додека надвор од него сите релевантни актери треба да бидат обединети околу заедничка визија. Затоа веруваме дека можните идни партнерства и можностите за заеднички развој помеѓу Евролигата и НБА Европа би придонеле значително за развојот на спортот во Европа.“
Патот на Фенер е јасен – Евролигата.
„Уште од првиот ден, нашиот клуб ќе продолжи да поддржува секој конструктивен дијалог насочен кон развој, единство и напредок на европската кошарка. Во овој момент, Фенербахче донесе одлука да го обнови својот лиценцен договор со Евролигата, кој истече на крајот од тековната сезона. Нашата цел оди подалеку од обичен натпреварувачки успех. Сакаме да придонесеме за одржлив развој, економско јакнење и зајакнување на глобалниот бренд на европската кошарка. Како и досега, ќе продолжиме да ја преземаме одговорноста за развојот на европската кошарка, да одржиме конструктивен пристап и континуирано да работиме на иднината на овој спорт“.
