Кошаркарот на Реал Мадрид, Марио Хезоња, пред Фајналфорот на Евролигата изјави дека се надева дека ќе го носи дресот на тој тим уште многу години.
Финалниот турнир на Евролигата е закажан од петок до недела во Атина. Натпреварите ќе се играат на ОАКА Арената – домот на кошаркарите на Панатинаикос.
Полуфиналето е закажано за петок – Олимпијакос и Фенербахче ќе се сретнат во 17 часот, а Валенсија и Реал Мадрид во 20 часот.
Хезоња е меѓу најдобрите играчи на Реал оваа сезона. Само крилниот центар Треј Лајлс е малку поефикасен од него (13,1 поен по натпревар во споредба со 12,9), но хрватското крило обично е примарна опција на Серхио Скариола во неизвесни финалиња.
„Мислам дека ова е најважниот кошаркарски турнир во светот. Тоа се два натпревари и тоа е најважниот и најтешкиот момент, и индивидуално и како тим. Мислам дека тимот е во добра форма, подготвен и трениран да достигне високо ниво против Валенсија“, изјави Хезоња за клупската телевизија на Реал Мадрид.
Шпанскиот шампион ја заврши регуларната сезона на третото место, пред да го елиминира Хапоел Тел Авив со 3-1 во четвртфиналната серија.
„Мораме да одиме таму за да победиме, но мора да заборавиме на притисокот, бидејќи притисокот никогаш не носи ништо добро“, рече хрватскиот интернационалец, додавајќи:
„Мораме да играме со страст, да бидеме целосно фокусирани и да знаеме како да се справиме со сè што го опкружува овој турнир, бидејќи иако е прекрасно искуство, има и многу одвлекувања на вниманието. Мора да бидеме паметни во нашите подготовки и во начинот на кој го доживуваме таму.“
Реал ја победи Валенсија во претходните четири натпревари, но сега ќе биде без повредените центри Валтер Таварес и Алекс Лено.
„Чест ми е да го носам овој дрес толку долго и се надевам дека ќе го носам уште многу години. Секој мора да се истакне. Вистинска штета е што двајцата се повредија на истата позиција, имаме голема почит кон нив.“
Тимот трениран од Педро Мартинез стигна до својот прв Ф4 со спектакуларен камбек во четвртфиналната серија против Панатинаикос.
„Валенсија игра на високо ниво цела година. Тие имаат состав што им овозможува да играат со многу замени и ротации. Нивното ниво на игра во нападот е многу високо“, рече Хезоња.
„Не е изненадување за мене, но е за многу луѓе, можеби во медиумите или меѓу навивачите. Кога ги познавате овие играчи и Педро, кој е одличен тренер – тој веќе заврши одлична работа во Манреса – тогаш сте подготвени за нивото што нивниот тим може да го достигне.“, порача Хрватот.
Валенсија го освои Суперкупот на Шпанија претходно оваа сезона, победувајќи го Реал Мадрид во финалето, откако го загуби финалето на АЦБ лигата од Мадрид претходната сезона.
„Тие нè победија и во Суперкупот, па сега мора да го подигнеме нашето ниво на игра. Ќе биде тешко да ги победиме.“
