Хрватскиот кошаркар Марио Хезоња би можел да стане едно од најинтересните имиња на летниот преоден рок. И покрај фактот дека има важечки договор со Реал Мадрид до летото 2029 година, новиот тим во Евролигата – Дубаи, е сериозно заинтересиран за неговите услуги.
Според италијанскиот Backdoor Podcast, иднината на Хезоња во Реал повторно станала главна тема во Мадрид. Иако Реал го обезбеди неговиот престој минатото лето со продолжување на договорот за уште пет сезони, ситуацијата не е толку едноставна. Истиот извор наведува дека договорот содржи клаузула од околу еден милион долари, но се однесува исклучиво на преселба во НБА лигата. Ова значи дека секој европски клуб што сака да го доведе би морал директно да преговара со раководството на Реал Мадрид.
Тука во приказната влегува Дубаи, најновиот член на Евролигата, кој наводно е подготвен да го ангажира Хезоња ова лето. Парите, се разбира, не се пречка за нив. Шпекулациите ги поттикнуваат гласините дека Хезоња е незадоволен од својата улога во мадридскиот клуб и тренерот Серхио Скариоло, но засега нема официјална потврда дека Реал би бил спремен да се откаже од еден од своите клучни играчи.
Важноста на Хезоња за тимот е несомнена, што се потврдува со фактот дека неодамна го одигра својот 300-ти натпревар за клубот. Во Евролигата оваа сезона, тој има просек од 13,2 поени и четири скока, додека во шпанското првенство е уште поуспешен со 16,2 поени и 4,2 скока.
