Јиржи Лехечка не успеа да ја освои титулата во Мајами, но по финалето покажа класа и спортски дух, оддавајќи му почит на Јаник Синер.
Чешкиот тенисер, видливо разочаран, но смирен, им се обрати на присутните за време на церемонијата и нагласи дека и покрај поразот, имал многу причини да биде среќен.
„Не е лесно да се стои тука по ваков пораз во финалето. Ако веќе треба да загубам од некого, нека биде тоа од тебе, Јаник. Честитки до тебе и твојот тим за неверојатната работа што ја работиш. Мислам дека ова беше одличен турнир. Дојдов тука надвор од форма, а успеав да го пронајдам тенисот што сакам да го играм“, рече Лехечка, продолжувајќи:
„Благодарност до мојот тим… до сите мои пријатели таму. Тоа многу ми значи. На сите што ме поддржуваат дома, што ме гледаат на телевизија и навиваат цела недела – многу ми значи. Среќен сум и тажен во исто време. Се надевам дека следниот пат ќе го кренам трофејот.“
Со овој резултат, Лехечка го достигна најдобриот ранг во својата кариера и од понеделник е рангиран на 14-то место на АТП ранг-листата.
