Играчот на италијански Тренто, Андреј Јакимовски максимално подготвен го дочекува новиот собир на кошаркарските репрезентативци, откако порача дека тимот треба да продолжи да ја гради тимската игра, како и меѓусебната хемија.
Смета дека со помош на новиот селектор, Жозеп Мариа Берокал треба да се постави тој систем на игра.
„Краток е периодот за подготовка, ама мислам дека ќе успееме. Досега не сме играле со Луксембург. Имаат доста добри играчи, Очекувам добар натпревар, а нашиот фокус е само на нас. И да ја подобриме нашата игра како што го направивме тоа во претходниот циклус“, потенцира Јакимовски, цитиран од КФСМ.
Ги сподели и впечатоци околу соработката со новиот селектор.
„Како што селекторот кажа, сака брза игра, игра во транзиција. Поставиме неколку напади, поставивме и систем во одбрана. Со интенција да имаме брза игра. Да, периодот за тоа е краток. Не може да се постават повеќе работи во овие три-четири дена. Се надевам дека во наредниот циклус за време на летниот период ќе може да тренираме повеќе и селекторот да го постави својот стил на игра“, изјави Јакимовски.
Дуелот ќе се одигра во петок навечер, од 18.часот, во салата „Градски парк“ во Скопје.
