Матијас Лесор се врати на теренот за Панатинаикос по долга пауза поради повреда и веднаш одигра важна улога во победата над Жалгирис Каунас со резултат 92:88.
Францускиот центар постигна девет поени, запиша три скока и забележа индекс на корисност од 8, што беа и неговите први поени во салата ОАКА од 19 декември 2024 година.
По натпреварот, Лесор зборуваше за емоциите што ги доживеал по враќањето на теренот и објасни дека најважно за него е да му помогне на тимот.
„Само се обидував да ја правам мојата рутина и да пристапам кон играта на ист начин како што правев пред да се повредам. Секако, имаше многу адреналин и возбуда, но се обидував да се смирам и да си кажам дека треба да играм како порано. Не сакав овој натпревар да биде за мене. Сакав да биде за тимот и победата што ни беше потребна. Не се обидував да бидам херој, само сакав да бидам добар соиграч и да му помогнам на тимот да победи“, рече Лесор.
Лесор особено истакна колку многу му значеше поддршката од неговото семејство за време на неговото закрепнување.
„Многу ми значеше. Тие ме гледаа низ што минувам во последните година и пол и поддршката што ми ја дадоа беше неверојатна. Не можев да го пребродам сето ова без нив. Вечерва ќе си одиме дома и малку ќе прославиме. Ова беше прв пат да го видам мојот син како заспива за време на натпревар, па веројатно ќе го успиjам рано вечерва, а потоа ќе уживам со остатокот од семејството.“
Французинот им се заблагодари и на навивачите кои го поддржаа за време на неговата рехабилитација.
„Добивам пораки од целиот свет и не можам доволно да им се заблагодарам на навивачите. Навивачите на Панатинаикос беа огромна поддршка, но и навивачите на Партизан“, рече Лесор, додавајќи: „Тоа се два клуба што ги носам во срцето. Она што го доживеав овде во Панатинаикос вечерва, начинот на кој навивачите ме пречекаа, засекогаш ќе ми остане во срцето.“
