Војната меѓу Израел и Иран, во која се вклучени и Соединетите Американски Држави, ќе предизвика вистински хаос во спортот, a ќе влијае и на Евролигата.
Утрово, претседателот на КК Партизан, Остоја Мијајловиќ, проговори за ова, откривајќи дека натпреварот меѓу црно-белите и Дубаи ќе биде одложен.
Натпреварот требаше да се игра во четврток во Белград, но е јасно дека тимот од Дубаи нема да може да стигне до српската престолнина.
Според Мијајловиќ, 14 играчи од Евролигата и тренерот на Фенербахче, Шарунас Јасикевичиус, се во Дубаи. Тој откри и дека тројца кошаркари на Партизан се во Дубаи.
Тоа се Дилан Осетковски, Дуан Вашингтон и Шејк Милтон.
„Нашите тројца играчи отидоа на одмор во Дубаи, како и многу луѓе кои го гледаа Дубаи како врвна дестинација за одмор и забава во последните 10-15 години. Отидоа и тоа е нивно право, не можат да добијат препораки каде да одат, а каде да не одат“, ја започна Мијаиловиќ својата приказна за моменталната ситуација.
„Во моментов, според нашите информации, во Дубаи има 14 играчи од Евролигата и еден тренер, Шарунас Јасикевичиус. Нашите тројца играчи се во постојан контакт со клубот. Тие се безбедни, би сакал да му се заблагодарам на КК Дубаи што им дозволи да тренираат додека се таму. Тие нема да летаат за Белград денес или утре, па затоа натпреварот против Дубаи дефинитивно ќе биде одложен“, потврди претседателот на Партизан.
„Единствениот аеродром што работи во областа е оној во Оман. Ситуацијата е комплицирана како да се стигне таму, по копно е четири и пол часа. Во моментов нема услови за тоа. Нашите играчи се наша грижа, но ако земеме предвид дека Обединетите Арапски Емирати имаат 11.000.000 жители, а само 1.000.000 се Емирати. Сите други се емигранти, што значи дека нашите играчи не се единствената грижа. Многу луѓе чекаат да се вратат од тие области. Ова е шок за сите нас“, рече Мијаиловиќ.
Тој додаде дека не може да процени кога кошаркарите на Партизан би можеле да се вратат во Белград, но дека постојат гаранции и ветувања дека ќе летаат за Оман.
Исто така, ќе биде интересно да се види што ќе се случи со натпреварот меѓу Босна и Партизан, кој е планиран за недела, 8 март во сараевска Зетра.
