Поранешниот спортски директор на Кошаркарската федерација (МКФ) си заминува на својот Фејсбук профил сподели дека прави пауза од кошарката.
„По 8 години работа, 2 откази – еден на сила и еден сега спогодбено, дојде време да направиме пауза од Кошарката“, истакна синот на поранешниот прв човек на македонската кошарка Зоре Темелковски.
„Влегов во кошаркарската приказна со голема љубов, верба, планови и очекувања во кошарката, си заминувам за жал со разочарување од постигнатото и со мало каење што не добив шанса и можност да го промениме погубниот систем во кошарката, во кој 100% тврдам дека нема победници туку има само моментално преживеани.
Се надевам и одбирам да верувам во визијата и правецот на новото раководство дека ќе успеаат да најдат начин да ја сменат и подобрат кошаркарската реалност во која за жал или за среќа( времето ќе покаже) немаше место за мене.
Сакам да ги видам нашите момци на Европско или Олимпијада и сакам да видиме нов Перо во НБА или нов МВП на Европа како Пеце и Врба“.
Тој се заблагодари за соработката на сите претседатели под кои работел, на сите колеги и колешки, сопственици на клубови и тренери како и судии и играчи со кој што работел и соработувал изминативе 8 години и им посака успех и успеси во наредниов период.
„Ја сакам и ќе ја сакам кошарката и знам дека ова е само моментална пауза, а не крај на мојата Кошаркарска Приказна“, додаде Темелковски.
Фото: Фејсбук/Владимир Темелковски
