Украинскиот учесник во скелетон натпреварувања, Владислав Хераскевич, е дисквалификуван од олимписките натпревари откако планирал, и покрај забраната, да се натпреварува во шлем со фотографии од украински спортисти убиени во војната со Русија.
Хераскевич требаше да ја започне својата трка во четврток наутро, но кратко пред почетокот на трката, тој испрати јавен апел до Меѓународниот олимписки комитет (МОК) преку Х, барајќи дозвола да се натпреварува во таканаречената „шлем за сеќавање“.
„Никогаш не сакав скандал со МОК (Меѓународниот олимписки комитет) и јас не го создадов. МОК го создаде со своето толкување на правилата, кое многумина го сметаат за дискриминаторско. Иако овој скандал дозволи гласно да се зборува за мртвите украински спортисти, во исто време самиот факт на скандалот го одвлекува огромното внимание од самите натпревари и од спортистите што учествуваат во нив. Затоа, предлагам да се стави крај на овој скандал“, рече Хераскевич.
Украинскиот спортист, исто така, постави три барања до МОК во објавата.
* Укинување на забраната за употреба на „шлемот на сеќавањето“.
* Извинување за, како што изјави, притисокот на кој бил подложен во последните денови.
* Обезбедување генератори на енергија за украинските спортски објекти кои страдаат од секојдневно гранатирање, како знак на солидарност со украинскиот спорт.
„Навистина се надевам на одговор пред почетокот на натпреварот во скелетон“, напиша Хераскевич.
Одговорот дојде кратко пред почетокот на трката кога претседателката на МОК, Кирсти Ковентри, ги посети Хераскевич и неговиот татко.
„Тој е дисквалификуван“, изјави портпаролот на Украинскиот олимписки комитет откако МОК му понуди на Хераскевич опција да носи црна лента наместо шлем.
„Беше емотивно утро, за жал не можевме да постигнеме решение“, рече претседателката на МОК, Кирсти Ковентри.
„Не е прашање на пораката, туку на правилата“, додаде таа.
Неговиот тренер Михаило Хераскевич најави жалба до Арбитражниот суд за спорт (CAS).
