Третопласираната екипа во македонското првенство, ГРК Охрид, брани +9 во вториот натпревар од осминафиналето на Купот на ЕХФ во Прага овој викенд против Дукла.
Македонскиот репрезентативец и капитен на тимот, Гоце Ојлески најавува сериозен пристап кон натпреварот:
„Првиот натпревар го добивме со девет гола разлика. Можеби требаше да направиме повеќе, но имавме мал пад во финишот од натпреварот. Не можам да кажам дали ќе биде доволно – дефинитивно е нов натпревар, почнуваме од 0:0 и одиме во Прага за да играме добро, без да размислуваме за гол-разликата. Се подготвуваме најдобро што можеме и сигурен сум дека ќе одиграме уште еден квалитетен натпревар и ќе извојуваме уште една победа. Дукла се покажа како борбен тим кој не се предава. Знаеме дека ќе биде тежок натпревар, домаќинот ќе сака да победи, па затоа мора да влеземе со „ладна“ глава и да ја играме нашата игра. Тоа е единствениот начин да стигнеме до следната фаза“, рече искусниот крилен напаѓач.
